O martes 6 de novembro celebrarase unha sesión formativa para o profesorado de secundaria sobre o novo material interdisciplinar para ESO Climaeucambio e relacionarase esta iniciativa coa rede de centros de meteoroloxía escolar ClimánticaMeteo.
Ver axenda da xornada.
Relación dos 30 premios do Primeiro Concurso Climántica. Os que non conseguíchedes o premio esta vez, non vos desanimedes porque haberá máis convocatorias, así que seguide participando. Fixádevos na relación de material necesario ao facer o equipaxe. Acordádevos de vir coa autorización asinada por vosos pais e traede grapada coa mesma unha copia do voso DNI. Non vos esquezades de que o autobús sairá da parada de autobuses que está enfrente da estación de autobuses de Santiago mañan día 31 de outubro ás 17 horas. Levará un distintivo do proxecto.
O Equipo Climántica ven de publicar un libro do estudante con un nivel de competencia curricular básico de 1º de ESO, pero con un grao de atención á diversidade que permite aplicar actividades en diferentes cursos de ESO e programas de diversificación curricular. Todos os capítulos deste libro xa se poden descargar desde o apartado de Descargas.
O libro planificouse en estreita colaboración con MeteoGalicia manexando tanto datos directos das estacións meteorolóxicas como indirectos obtidos da información meteorolóxica da prensa e das webs de Climántica. e MeteoGalicia, por tanto ten como fíos condutores a Meteoroloxía, a Climatoloxía e o Cambio Climático. Sobre esta estrutura que por si mesma inclúe competencias de ciencias naturais, ciencias sociais e matemáticas, incorporouse a competencia lectoescritora mediante textos e actividades de lingua e literatura galega e lingua e literatura castelá e a competencia de aprender a aprender.
A competencia dixital queda resaltada en actividades con un formato singular e diferenciado e nela destacan as actividades que se propoñen para desenvolver en cadernos de bitácoras e foros. Tamén se propón desenvolver cursos de autoaprendizaxe dirixidos polo profesorado e desenvoltos desde o apartado de Formación desta web. Os cadernos de bitácoras e foros poranse en marcha no apartado de Centros cando os centros educativos que apliquen o libro os soliciten.
Proximamente porase en marcha un novo apartado que se denominará “ClimánticaMeteo” no que se navegará polos contidos recollidos neste libro. Desde este apartado poderase acceder aos recursos que publicará MeteoGalicia, entre os que destacan as representacións gráficas dos datos aportados polos centros que soliciten incorporarse a ClimanticaMeteo a través do enderezo clima@meteogalicia.es; así como animacións elaboradas a partires de imaxes obtidas con satélites que mostren a evolución dos fenómenos atmosféricos. Por último, e tamén para potenciar o uso didáctico da web, propóñense baterías de actividades que se poden facer a partir da visualización dos videos de cambio climático, mobilidade e enerxía que se poden proxectar desde a mesma web no apartado Climántica tv.
Proximamente procederase ao envío dun exemplar do libro a cada centro de Galicia que escolarice alumnado de ESO. Os centros que desexen aplicalo poden solicitar exemplares para os estudantes ao enderezo climantica@xunta.es. A estes centros tamén se lles fará chegar unha guía didáctica solucionario.
Climántica estivo presente na mesa redonda sobre Comunicación e Educación sobre o Cambio Climático que moderou o director do proxecto, Francisco Sóñora, e que se celebrou o día 25 de setembro no marco do I Congreso Internacional de Educación Ambiental dos Países Lusófonos e Galicia.
O primeiro membro da mesa en intervir foi o técnico do Centro Nacional de Educación Ambiental, Francisco Heras que expuxo un marco global, como experto en comunicación sobre cambio climático, destacando que o educador ambiental debe transmitir as causas, os riscos e como actuar diante da problemática do cambio climático.
De seguido interveu o catedrático de Edafoloxía da USC, Francisco Díaz - Fierros, tratando a temática dos riscos. Na súa exposición destacou que a sociedade xa percibe que o cambio climático é un problema, polo que a educación ambiental é un dos factores claves para informar sobre os riscos deste fenómeno. Precisou tamén que na súa opinión é necesario ensinar á poboación a avaliar os riscos deste problema ambiental.
Xa entrando en modelos de Educación Ambiental, Rachel Trajber, coordinadora de Educación Ambiental do Ministerio de Educación de Brasil expuxo as liñas que se están a seguir no seu departamento. Pola súa parte, Francisco Sóñora presentou o proxecto Climántica como un modelo concreto de educación, sensibilización e comunicación, situado como un dos catro piares do Plan Galego de Acción contra o Cambio Climático.
O día 14 de setembro comunicouse o proxecto Climántica no auditorio do Conservatorio de Santiago de Compostela dentro das Xornadas de Ciencia Ensino que se organizaron co motivo do Ano da Ciencia. A esta comunicación asistiron un número de docentes superior aos 200.
O Equipo Climántica ven de elaborar un libro do alumno para desenvolver a nova materia de 1º de ESO “Proxecto Interdisciplinar”. Este material elaborouse en colaboración con MeteoGalicia.
O libro do alumno planificouse desde os datos directos das estacións meteorolóxicas e os indirectos obtidos da información meteorolóxica da prensa e das webs de Climántica e MeteoGalicia, por tanto ten como fíos condutores a Meteoroloxía, a Climatoloxía e o Cambio Climático. Sobre esta estrutura que por si mesma inclúe competencias de ciencias naturais, ciencias sociais e matemáticas, incorporouse a competencia lectoescritora en base a textos e actividades de lingua e literatura galega e lingua e literatura castelá relativos a cada un dos elementos desta estrutura. Con esta mesma relación secuencial, incorporáronse as competencias de cálculo e de aprender a aprender.
A competencia dixital desenvólvese mediante o traballo desde a web de cursos de autoaprendizaxe dirixidos polo profesorado e desenvoltos desde o apartado de “Formación” desta web, na que tamén se atoporá diversa información da prensa e de meteoroloxía escolar. Tamén se propón nesta publicación baterías de actividades que se poden facer vendo os vídeos de cambio climático, mobilidade e enerxía que se poden proxectar desde a mesma web no apartado “Climántica tv”.
Proximamente porase en marcha un novo apartado que se denominará “ClimánticaMeteo” na que se divulgarán os contidos da publicación e a través do cal se poderá acceder aos recursos que sobre o subproxecto publicará MeteoGalicia.
Coincidindo co inicio do curso publicarase na web o material, unha vez aprobada a publicación pola Comisión do Libro. Tamén se procederá a enviar un exemplar a cada centro de Galicia que escolarice alumnado de 1º de ESO. A aqueles centros que desexen aplicalo, enviaráselle o corresponde libro do profesorado onde se aportarán orientacións, suxestións, recursos, así como as solucións a todas as actividades propostas. Este libro pode solicitarse a través do enderezo climantica@xunta.es, a través da cal se pode consultar calquera dúbida.
Xa está dispoñible en descargas a versión en castelán do primeiro número da banda deseñada Palmira e Marcial, odisea medioambiental.
As bases son as mesmas da primeira convocatoria recollidas nesta páxina web con estas tres particularidades:
1) Convócase unha única quenda, con un número máximo de 30 premiados, para todos os cursos de ESO, bacharelato e ciclos formativos.
2) Os cinco días de estancia serán os comprendidos entre o mércores 31 de outubro e o domingo 4 de novembro. O autobús collerase na estación de autobuses de Santiago ás 17:00 do mércores 31 de outubro e sairá do lugar da estancia o domingo 4 de novembro ás 16:00.
3) Os traballos deberán enviarse ao enderezo climantica@xunta.es antes do 26 de outubro, data na que se reunirá o xurado para decidir os 30 estudantes premiados. Ese mesmo día, os premiados recibirán un correo electrónico enviado ao enderezo a través do que remitiron o traballo e no que se lles concretará o plan de viaxe e o programa das actividades a realizar durante a estancia.
O IES Salvador de Madariaga de A Coruña invitóu ao Equipo Climántica a participar na celebración do Día Mundial do Medio Ambiente neste centro. Esta participación concretouse nunha charla-coloquio celebrada o 8 de xuño de 2007, e que tratóu sobre cambio climático. O auditorio estivo formado na súa maior parte por alumnos de 3º e 4º de ESO, aínda que tamén asistiu un activo grupo de alumnos de 1º ciclo de ESO que constitúen un equipo que traballa en obradoiros relativos ao medio ambiente.
Co obxectivo de sensibilizar sobre o problema do cambio climático, a Consellería de Medio Ambiente e Desenvolvemento Sostible convoca a primeira edición dos premios Climántica para elaboración de traballos sobre este proxecto de Educación Ambiental. Os premios consisten nunha estancia totalmente gratuíta de 5 días nun campamento de Educación Ambiental de Galicia no que tamén se desenvolverán actividades deportivas e de lecer. Esta estancia levarase a cabo en setembro, antes do inicio das clases do curso 2007-2008.
Establécense 3 categorías:
Narrativa: Redaccións, relatos reais e de ficción cuxa temática xire sobre algún tema que se trate no proxecto.
Multimedia: Pequenos vídeos, presentacións e animacións. Os formatos nos que se presenten deben responder ás seguintes características técnicas: resolución mínima 320 x 240. Formato de vídeo: mov, mp4, vob, dv, flv, avi, 3pg. Cada traballo multimedia irá acompañado dunha breve referencia do que o autor/a quere comunicar con ese traballo.
Fotografía: Cada foto debe levar una breve referencia do que autor/a quere comunicar con ela.
Os traballos remitiranse á seguinte dirección de correo electrónico climantica@xunta.es. O prazo de presentación de traballos é de dous meses, iniciándose o 18 de xuño e rematando o 18 de agosto e comunicaranse os premiados o 24 de agosto mediante un anuncio na web e envío dun correo electrónico á conta coa que se enviou o traballo.
Todos os traballos que cumpran os requisitos mínimos inseriranse na web na sección Concurso dentro do apartado de Centros. Todos os traballos que sexan incorporados á web de Climántica serán premiados co envío dunha camiseta ou dun maillot do proxecto, para o que se fará constar no correo co que se remita o traballo a elección de camiseta ou maillot e a talla.
Outorgaranse 10 premios por cada categoría para alumnado de ESO (os estudantes terán que ter cumpridos os 15 anos o 31 de decembro de 2007) e outros tantos para bacharelato e ciclos de grao medio e superior. Haberá dúas quendas, un para os 30 alumnos de ESO e outra diferente para os 30 alumnos de bacharelato e ciclos. Para outorgar os premios constituirase un xurado de expertos por cada categoría que se reunirán o día 23 de agosto. Os criterios que se seguirán para avaliar os traballos serán:
• Que exista unha relación clara co proxecto.
• Orixinalidade.
• Elaboración rigorosa.
• Capacidade de sensibilización.
• Grao de madurez na elaboración técnica.
• Que se mostren relacións entre coñecementos diferentes e comprensión dos mesmos.
Poderán declararse premios desertos se o xurado considera que non hai suficientes traballos de calidade para cubrir os 30 premios de ESO ou os 30 de bacharelato e ciclos formativos.
Para poder percibir o premio, o estudante deberá presentar antes de saída unha certificación académica en conforme estivo matriculado durante o curso 2006-2007 nun centro de ensino no nivel polo que concursou, copia certificada do DNI e se fora menor de idade unha autorización, permitíndolle asistir á estancia, asinada polo pai, nai ou titor legal; da que poderá descargar o formulario na web.
No marco das actividades da III Semana da tecnoloxía do IES Pintor Colmeiro de Silleda que se centrou no cambio climático e nas enerxías renovables, o xoves 7 de xuño, o Director Xeral de Desenvolvemento Sostible impartiu unha conferencia titulada “O cambio climático, un reto para Galicia e un reto para a Humanidade”. A seguinte conferencia correu a cargo do Director do proxecto, quen baixo “Cambia o clima? Climántica responde”, expuxo a importancia do cambio climático como fío conductor de todo o proxecto. Durante o coloquio destacou unha pregunta dunha alumna sobre os efectos do cambio climático sobre a esperanza de vida das persoas e se afectaría por igual nos países ricos que nos países pobres. Na Semana da tecnoloxía expuxéronse os mellores proxectos tecnolóxicos realizados polos alumnos durante o curso, entre os que podemos destacar unha cociña solar feita cunha parabólica e novos prototipos de robots.
O día 6 de xuño coincidindo coa celebración do Día mundial do medio ambiente, o equipo docente do IFP A Granxa que lidera a participación na Axenda 21 escolar dese centro, invitou ao Director Xeral de Desenvolvemento Sostible e ao Director do proxecto Climántica para que explicaran o reto do cambio climático e a contribución deste proxecto para afrontalo. Na presentación oficial da sesión formativa, que se celebrou no auditorio de Ponteareas, tamén interviron o Alcalde de Ponteareas e o Equipo docente coordinador da Axenda 21 escolar do IES A Granxa. O auditorio estivo constituído polos alumnos de secundaria dos institutos da zona educativa. Na fase de coloquio os estudantes preguntaron sobre a posible relación dos incendios forestais co cambio climático e sobre as posibilidades das enerxías renovables. O profesorado preguntou sobre o papel da enerxía nuclear e sobre a importancia dos bosques como sumidoiro.
O Cuarto seminario “Respostas desde a Educación e a Comunicación ante o cambio climático” celebrouse en Córdoba os días 24 e 25 de maio de 2007, coa participación de 55 expertos procedentes de administracións públicas (locais, autonómicas e xeral), organizacións non gobernamentais e empresas. No seminario presentáronse experiencias de educación, sensibilización e participación en materia de cambio climático promovidas desde Comunidades Autónomas (Andalucía, Cataluña, Galicia), así como traballos e campañas de comunicación desenvolvidos desde o sector non gobernamental (Ecoloxistas en Acción, Fundación Natura). No seminario celebráronse tamén tres talleres temáticos dedicados á reflexión e o debate sobre diversos temas de interese:
- Código de boas prácticas para unha publicidade responsable ante o cambio climático.
- Novas necesidades formativas expostas ante o cambio climático.
- Ideas para un novo plan de traballo para desenvolver o artigo 6 da Convención Marco de Nacións Unidas sobre o Cambio Climático.
As principais suxestións e conclusións derivadas do debate son as seguintes:Taller 1: Código de boas prácticas para unha publicidade responsable ante o cambio climático.
Taller 2: Novas necesidades formativas expostas ante o cambio climático.
No marco das actividades da VI Semana da ciencia do IES Nº1 de Ribeira que se centrou no cambio climático, o martes 29 de maio, o Director Xeral de Desenvolvemento Sostible impartiu unha conferencia titulada “O cambio climático, un reto para Galicia e un reto para a Humanidade”. A seguinte conferencia correu a cargo do Director do proxecto, quen baixo “Cambia o clima? Climántica responde”, expuxo a importancia do cambio Climático como fío conductor de todo o proxecto. Durante o coloquio correspondente á primeira intervención os alumnos interesáronse por os principais problemas ambientais de Galicia, as solucións máis urxentes, sobre se podería compensar o uso da enerxía nuclear. As preguntas relativas á segunda intervención centráronse na existencia de riscos de furacáns en Galicia, a importancia de que se adopten medidas políticas para resolver o problema e a duración no tempo do proxecto Climántica.
Por último a organización da VI semana invitou ao Director Xeral e ao Equipo Climántica a ver a exposición de actividades prácticas, recibindo unha detallada explicación daquelas que resultaron da aplicación do proxecto no centro, entre as que destacan modelos de simulación coma os dos efectos Ártico e Antártico, efecto invernadoiro, formación de furacáns, prácticas para evidenciar os efectos da choiva ácida, construcción dun pequeno coche solar e visualización dunha extensa exposición de murais relativos ao cambio climático. Todas estas actividades, ao igual que as dos demais centros que desenvolvan o proxecto, poden verse no apartado de Centros desta web.
No marco dos actos programados na Semana Cultural do IES “Agra de Raíces” de Cee, o día 14 de maio celebrouse unha charla coloquio, dentro do programa Climántica Formación, co alumnado de 3º e 4º da ESO. Os alumnos aportaron a súa visión do problema do cambio climático achegando varios resumos da charla onde recoñecen a implicación da Humanidade coas súas emisións de gases de efecto invernadoiro e onde reflicten as súas inquedanzas polas consecuencias do aumento da temperatura do planeta. Os rapaces preguntaron se aguantarían os seres vivos un cambio climático se a temperatura segue aumentando durante 100.000 anos ou cantos anos duraría a Terra se seguimos coas mesmas emisións de CO2. Asimesmo se interesaron por saber se somos nós os encargados de cambiar o clima e os problemas que afectan a éste e tamén por que EEUU sabendo o que pasa non fai nada.
O proxecto Climántica estará presente no IV SEMINARIO SOBRE COMUNICACIÓN, EDUCACIÓN E PARTICIPACIÓN FRONTE AO CAMBIO CLIMÁTICO que se celebrará en Córdoba, 24-25 de maio de 2007 organizado pola Oficina Española de Cambio Climático (OECC) e o Centro Nacional de Ecuación Ambiental (CENEAM - Ministerio de Medio Ambiente) e a Secretaría General de Sostenibilidad da Consejería de Medio Ambiente da Junta de Andalucía.
O proxecto “Climántica” da Xunta de Galicia, de acordo co programa, será presentado polo director do mesmo Francisco Sóñora Luna o xoves 24 de maio de 11:45 a 12:15 horas e despois da presentación da Estratexia Andaluza ante o cambio Climático e da Estratexia de participación para o plan de Acción de adaptación e mitigación en Catalunya, haberá un debate de 45 minutos sobre o contido das tres intervencións.
Pode consultar o programa nesta ligazón.
Xa está en descargas o primeiro número da banda deseñada Palmira e Marcial, odisea medioambiental.
