Climántica, proyecto de educación ambiental

Xa se pode descargar en Unidades didácticas do apartado Biblioteca o Capítulo 1. Unha substancia universal en versións galego e castelán.  Tamén se pode navegar polo seu contido extraído para a divulgación cara a cidadanía en xeral premendo no terceiro apartado Auga e cambio climático do menú da marxe esquerda pa páxina de Inicio. Durante as vindeiras semanas irase procedendo do mesmo xeito cos 7 capítulos restantes:

Capítulo 2. A auga en movemento.
Capítulo 3. Historia, presente e futuro da auga na Terra.
Capítulo 4. A auga fonte de vida dende os océanos á terra firme.
Capítulo 5. A auga na historia da humanidade.
Capítulo 6. O cambio climático nunha sociedade sedenta.
Capítulo 7. A auga, un recurso crítico na sociedade do cambio climático.
Capítulo 8. Un cambio de dirección cara o uso sustentable na sociedade do cambio climático.

A Asociación portuguesa de Educación Ambiental (ASPEA) e a Fábrica de Ciencia Viva de Aveiro, convidaron ao director de Climántica, Francisco Sóñora, a impartir o relatorio inaugural das II Jornadas de Art’ Ambiente, da que se pode ver un vídeo resumo en Climántica TV. Esta comunicación celebrouse no Anfiteatro do Departamento de Geociencias da Universidade de Aveiro. A comunicación tratou sobre os produtos de creación artística dos estudantes de Climántica e dos artistas profesionais que colaboran co proxecto.

Nova sobre as xornadas nos informativos da TV local de Aveiro.

A menos dun mes do remate do cuarto curso completo de aplicación de Climántica nos centros educativos de Galicia, procedeuse ao estreo do vídeo Catro cursos de Climántica en Climántica TV. Nel faise un recorrido cronolóxico da participación do alumnado e do profesorado na aplicación do proxecto en Galicia. No remate do mesmo, faise tamén un percorrido pola aplicación do proxecto noutros estados e comunidades autónomas.

O proxecto Climántica foi invitado a participar nas IX Jornadas de Ciencias de la Tierra do Planetario de Castellón con unha conferencia e dous obradoiros. O Planetario de Castellón organiza estas xornadas para toda a cidadanía, sen máis límites que os establecidos polo aforo do salón de actos e, no caso dos obradoiros, o número máximo que permita o bo desenvolvemento dos mesmos. Pero os profesores acreditados polo CEFIRE de Castellón teñen prioridade, tanto nas conferencias coma nos obradoiros. Nesta edición acreditáronse máis de 100 docentes.

Xa está publicado en Climántica TV o vídeo que recolle a conferencia Aproximación interdisciplinar desde Climántica al cambio climático y a la crisis energética. No seu desenvolvemento, Francisco Sóñora, director de Climántica, expuxo a dimensión divulgativa da organización didáctica interdisciplinar do proxecto Climántica sobre cambio climático e as súas vinculacións co problema enerxético.

O profesor Sóñora presentou en Castellón a Climántica como un proxecto de Educación Ambiental en rede co obxectivo básico de intercambiar ideas e experiencias educativas, xerar produtos didácticos interdisciplinares, enriquecer o currículo de Educación Ambiental e abordar as principais problemáticas ambientais relacionándoas co cambio climático. Situouno como un proxecto institucional formando parte do piar educativo do plan marco de Galicia fronte ao cambio climático, que vai dirixido, de forma transversal, a todos os niveis do sistema educativo, co fin de aproveitar o desenvolvemento didáctico dos docentes para divulgar e sensibilizar sobre o reto a toda a cidadanía a través do seu portal trilingüe climantica.org.

Sobre a base desa flexibilidade e capacidade de Climántica para saír das aulas á sociedade, xustificou o enfoque que elixiu para a conferencia, na liña de comunicar ao público en xeral o cambio climático e as súas relacións coa crise enerxética actual.

En resumo, abordou cun estilo moi didáctico, o concepto de cambio climático, o modelo que o explica, situando a súa evolución histórica ao longo de diferentes ciclos enerxéticos, con especial incidencia no actual, correspondente á obtención de enerxía a partires dos combustibles fósiles. Así mesmo explicou e exemplificou diversas consecuencias, para rematar apuntando solucións, facendo unha mención final ao potencial das respostas educativas ao cambio climático promovidas dende Climántica.

Tamén se pode ver en Climántica TV o vídeo que resume os obradoiros. Estes foron desenvoltos polas profesoras do IES Nº 1 de  Ribeira Mercedes Rodríguez Ruibal e Raquel Troitiño Barros, que colaboran con Climántica na dimensión de formar aos estudantes para que expliquen o cambio climático mediante experiencias de laboratorio.

Para estes obradoiros seleccionaron unha serie de experiencias que permiten recrear de forma experimental, intuitiva e vivencial, un conxunto de actividades prácticas, sinxelas e rigorosas á vez, que nos permitan contribuír á aprendizaxe activa das evidencias, causas, consecuencias e propostas de mitigación do cambio climático, conxugando a razón coa emoción, e o espírito lúdico co rigor científico, na perspectiva da sostibilidade.

Cos obradoiros, ademais de reproducir o procedemento experimental, fundamentaron tamén os seus obxectivos didácticos, e fixeron chegar aos asistentes as orientacións metodolóxicas para converter os estudantes en monitores e protagonistas activos do seu propio sistema de aprendizaxe.

Para o desenvolvemento dos obradoiros usaron dúas metodoloxías:

1.- Actividades Experimentais: conxunto de actividades seleccionadas para realizar de forma práctica en grupos de traballo, constitúe a parte principal do taller.
2.- Presentación Multimedia: comprende aquelas actividades cuxo desenvolvemento non se podía executar en obradoiros desa duración, pero que interesaba que os asistentes os coñeceran pólo seu potencial didáctico.

No primeiro apartado, temos:
1.1 - Simulando Correntes de Convección.
1.2.- Demostrando o papel regulador térmico da auga.
1.3.- Quentamento terrestre: Absorción de radiación e simulación de invernadoiro.
1.4.- Emisión de gases con efecto invernadoiro por uso de combustibles fósiles: Presenza de CO2 e NOx nos tubos de escape dos vehículos.
1.5. - Aumento de fenómenos meteorolóxicos extremos: Simulación dun ciclón.
1.6.- Consecuencias en ecosistemas acuáticos: desxeo. Modelos ártico e antártico.
1.7.- Outros efectos dos contaminantes atmosféricos: choiva ácida.
1.8.- Relación entre illamento térmico e aforro enerxético.
1.9.- Determinación da presenza de contaminantes na auga (fecal, exceso de nutrientes).

No segundo apartado incluíron:
2.1.- Efecto de diferentes contaminantes na xerminación e crecemento vexetal.
2.2.- Fundamentación da importancia da enerxía térmico-solar na solución do cambio climático: Construción dun forno solar.
2.3.- Aforro de auga: Modelo dunha depuradora caseira.
2.4.- Actividades didácticas de Meteoroloxía: Rede de Meteoescolas.

O director do proxecto Climántica, Francisco Sóñora, foi invitado pola presidenta da Asociación portuguesa de Educación Ambiental, Fátima Almeida, para presentar o modelo de formación do profesorado nas XVIII xornadas pedagóxicas da asociación que se celebraron na localidade de Idanha-a-Nova os días 28, 29 e 30 de xaneiro de 2011. Pode visualizarse en Climántica TV un vídeo-resumo desta presentación a máis de 200 educadores ambientais procedentes de todas as rexións de Portugal.

O profesor Sóñora empezou a súa intervención comunicando o modelo xeral de formación do profesorado, e a súa relación co esquema xeral de desenvolvemento das etapas do proxecto e os produtos didácticos de cada unha delas.

De seguido entrou no contido das dúas xornadas correspondentes a cada unha das etapas desenvolvidas do proxecto Cambia o clima? e Se queimamos quentamos, para centrarse deseguido nos dous modelos prácticos baseados en obradoiros e en seminarios: Competencias básicas en Climántica para 10 -15 anos  Ciencias para o Mundo Contemporáneo no proxecto Climántica para 16-18 anos.

Sobre o primeiro modelo, fixo mención a que todas as propostas formativas que se propoñen aos profesores van encamiñadas a que logo estes poidan implicar nelas aos estudantes para desenvolveren así as súas competencias científicas, de expresión oral e escrita, e de expresión plástica.

Sobre a segunda, fixo referencia á importancia de poñer aos estudantes a desenvolver proxectos de investigación e comunicación científica conducidos por esta formulación de proposta de traballo nas aulas: “Dende o Big Bang ata os nosos tempos formouse a Terra, e nela,a través dun longo proceso evolutivo, aparecemos como unha especie capaz de modificar o Planeta provocando riscos (como os derivados do cambio climático) aos que a investigación científica busca solucións para a súa mitigación e a nosa adaptación dende a astrofísica, da física de partículas, da nanotecnoloxía da bioloxía molecular e da xenómica”.

Sobre ámbalas dúas propostas prácticas de formación do profesorado, destacou a importancia de enfocalas para conseguir que os estudantes elaboren produtos de sensibilización para toda a cidadanía, tanto en papel como en edublogues. Tamén sinalou a importancia que se lle da a difusión destes traballos, chegando a publicalos en revistas CLMNTK de estudantes, das que xa hai 3 números publicados na páxina web. Destes traballos fixo especial mención ás recensións de traballos multimedia, que é posible visualizalos dende o apartado Alumnos deste sitio web.

En relación a este obxectivo de sensibilizar á cidadanía a través dos traballos dos estudantes, destacou a importancia dos Congresos CLMNTK dos que se levan celebrado un por cada número da revista. Dixo que esta importancia viña dada sobre todo porque os estudantes que presentan traballos, conseguen invitacións para ir acompañados dos pais, avós e irmáns.

A súa vez o congreso vai a conseguir reforzar o potencial creativo dos autores dos traballos máis destacados, premiándoos con campamentos formativos de 5 días onde conviven e se forman para incrementar a súa creatividade e capacidade de traballo en equipo en retos de investigación e comunicación na que aportan o talento polo que foron premiados. Así no último campamento formativo de premiados de ESO, os estudantes recorreron as Rías Baixas navegando nun veleiro de principios do século pasado durante cinco días para estudar e comunicar dende o punto de vista lingüístico, de artes plásticas, audiovisuais e musicais, os cambios que experimentaron o clima, as paisaxes e a economía das rías das Rías Baixas.

Destacou que estes contactos coas familias supoñen unha oportunidade para afondar no modelo de formación interxeneracional propio das Escolas Climántica de Avós e Netos, como metodoloxía para facer chegar ás aulas a memoria histórica dos avós sobre os cambios no clima, no consumo e na mobilidade ao longo da súa vida.

Xusto antes de entrar na experiencia de Climántica na formación do profesorado en Portugal, comunicou a importancia que tivo o I Congreso de respostas educativas sobre o cambio climático que se celebrou en Pontevedra os días 7 e 8 de maio de 2010 para retroalimentar e avaliar estes modelos de formación.

Para concluír, recapitulou a experiencia do primeiro curso de formación do profesorado en Portugal celebrado no centro de formación do profesorado Nova Ágora de Coimbra, presentando un curto sobre a posta en común deste curso, cos 18 edublogues resultantes e ilustrando a conclusión con imaxes do I Simposio de estudantes de Climántica en Portugal, no que os estudantes, orientados polos vinte profesores formados nesa acción de formación, presentaron os seus traballos.

Está a disposición de todos os centros educativos de Primaria e Secundaria de Galicia sostidos con fondos públicos, a oferta de obradoiros de Climántica para desenvolver antes de que remate o curso 2010-2011. As características e condicións de adxudicación están no folleto explicativo. Os centros interesados deberán enviar desde o seu correo corporativo o formulario debidamente cuberto ao enderezo de correo electrónico climantica@climantica.org, poñendo no asunto: “Solicitude de obradoiros do ..(nome do centro).

Climántica quere transmitir aos usuarios desta web feliz Nadal e ventureiro aninovo 2011 con lembranzas dos mellores momentos do ano 2010 presentados por Palmira e Marcial.

Vídeo en Climántica TV

Xa se pode ver en Climántica TV o vídeo da conferencia de Climántica no V Congreso de Materiais didácticos organizado pola ASPEG e que se celebrou na Facultade de Educación da Universidade de Santiago de Compostela o día 6 de novembro de 2010. Baixo o título Materiais e recursos de Climántica, o director do proxecto, Francisco Sóñora Luna, situou os diferentes produtos e materiais de Climántica dentro dos obxectivos xerais, características e principios de deseño do proxecto.

Estes materiais didácticos poden solicitarse en versión impresa enviando un correo a climantica@climantica.org no que se farán constar os datos do docente que o solicita, o centro no que está destinado e os cursos e as materias nos que os vai a usar:


Para 4º ESO e Bacharelato:

O Libro didáctico de cambio climático e o relativo ao Problema enerxético no cambio climático que están a seren usados maioritariamente en Ciencias para o Mundo Contemporáneo, Ciencias da Terra e Ambientais, Bioloxía e Xeoloxía, Física e Química e Xeografía e Historia. Estes dous libros tamén se poden descargar dende estes links:

http://biblioteca.climantica.org/gl/biblioteca/unidades-didacticas/unidade-1

http://biblioteca.climantica.org/gl/biblioteca/unidades-didacticas/unidade-2

Este material compleméntase con unha Exposición Interactiva On-line deseñada para visualizar os paneis na pantalla do ordenador, podendo afondar máis no seu contido mediante un sistema de navegación e con uns cuestionarios vinculados a cada panel que o estudante responde unha vez que analizou o contido dos paneis e o contido navegable asociado. Os docentes que queiran usar este material on-line non teñen máis que enviar unha relación de estudantes, xunto coa materia e curso no que van a aplicalo. Nun prazo de 24 horas enviaráselles usuarios e contrasinais.


Para proxectos interdisciplinares, PDCs e materias de Xeografía e Historia de ESO:

O libro interdisciplinar baseado nas competencias básicas e conducido polos elementos do clima e o cambio climático, Climaeucambio e tamén a súa Guía didáctica solucionario, que tamén se poden descargar dende:

http://biblioteca.climantica.org/gl/biblioteca/unidades-didacticas/climaeucambio

http://biblioteca.climantica.org/resources/1893/guiaclima.pdf


Para 5º e 6º de Primaria e proxectos interdisciplinares de 1º de ESO:

Baseadas na memoria interxeneracional sobre o clima e a incidencia no seu cambio das prácticas na mobilidade e no consumo pode pedirse o libro Aprendemos coas escolas Climánticas con dinámicas de grupos, actividades de laboratorio e fichas para o estudante de aplicación directa na aula, solucións das mesmas e orientacións didácticas para o docente.

http://biblioteca.climantica.org/gl/biblioteca/unidades-didacticas/escolas-climanticas

Que ten a súa versión de actividades interactivas para desenvolver dende a páxina web en:

http://eduprimaria.climantica.org

Como moitas das actividades de Aprendemos coas Escolas Climánticas están baseadas nas bandas deseñadas de Palmira e Marcial, odisea medioambiental e na novela do proxecto A treboada de C, tamén se poden pedir exemplares ou descargalos:

http://biblioteca.climantica.org/gl/biblioteca/comics/numero-2

http://biblioteca.climantica.org/gl/biblioteca/novelas/a-treboada-de-c/version-completa

Aprendemos coas Escolas Climánticas ademais de ser un libro de fichas para os estudantes acompañadas das súas solucións e orientacións para o docente, contén no seu último capítulo orientacións didácticas baseadas no vídeo xogo on-line de toma de decisións na xestión do territorio, da enerxía e dos recursos para facer fronte ao cambio climático na primeira metade do século XXI.

Os usuarios e contrasinais poden elixilos os estudantes cando entran na aplicación.

http://xogo.climantica.org/?locale=gl


Climántica ten programado un plan de formación de profesores e de estudantes para traballar con estes materiais similar ao curso anterior e que está pendente de aprobación. Todas as iniciativas que se vaian aprobando irán publicándose nesta páxina.

Retransmisión en directo

A Consellería de Medio Ambiente, Territorio e Infraestruturas, a través da Dirección Xeral de Sostibilidade e Paisaxe, xunto coa Consellería de Educación e Ordenación Universitaria, organiza o I Congreso Climántica, que versará sobre as respostas educativas ao fenómeno do cambio climático. O Congreso terá lugar no Centro Social Caixanova en Pontevedra os vindeiros venres e sábado, 7 e 8 de maio.

Este foro educativo está dirixido principalmente aos profesores do ensino non universitario, tanto de Galicia como de fóra da comunidade, que queiran dar a coñecer as súas experiencias no ámbito educativo sobre o cambio climático. O número de inscritos neste encontro educativo ambiental ascende a case 800 docentes.

A programación do Congreso contará con importantes intervencións de destacados expertos no campo do Cambio Climático, así como expertos en materia de comunicación que abordará as fórmulas para romper as barreiras da comunicación en relación co cambio climático. O venres 7 de maio, ás 17:00 horas, terá lugar o acto de inauguración e, posteriormente, o xornalista e presidente da Real Academia das Ciencias e as Artes da Televisión, Manuel Campo Vidal ofrecerá a conferencia Estratexias técnicas para superar barreiras de comunicación do cambio climático.

Orde do 12 de abril de 2010, da Consellería de Medio Ambiente, Territorio e Infraestruturas, pola que se aproban as bases reguladoras e a convocatoria dos premios a experiencias curriculares no proxecto Climántica en centros educativos de ensino público, durante o curso 2009-2010.

O Enviado Especial das Nacións Unidas sobre o Cambio Climático e presidente da Fundación Democracia e Desenvolvemento, o ex - presidente de Chile Sr. D. Ricardo Lagos, manifestou á Xunta de Galicia que despois de analizar con atención e interese o traballo realizado polo equipo de Climántica, considera que é un interesante proxecto de carácter docente e que o recomenda para ser usado con eses mesmos fins. O respaldo do Enviado Especial de Nacións Unidas fíxose efectivo mediante unha carta recibida o pasado 14 de abril a través da Dirección Xeral de Sostibilidade e Paisaxe.

O interese da ONU en Climántica manifestouse por primeira vez mediante a petición dun informe por parte da súa sede en Xenebra. Unha vez presentado este informe, a Xunta de Galicia presentouno na súa sede de Nova York o 2 de xuño de 2008. Posteriormente presentouse tamén como proxecto de boas prácticas de España, a proposta da Oficina Española para o Cambio Climático, no Seminario europeo das Nacións Unidas celebrado en Estocolmo en maio de 2009.

Climántica ben de publicar no seu canal de Proxecto Climántica de Climántica TV a curtometraxe de debuxos animados 2101 Regreso a Climántica no que Palmira e Marcial, no inicio do século XXII, nos explican o proxecto Climántica e as súas orixes.

Climántica presentouse na xornada inaugural do V Congreso de Educared que se está a celebrar en Madrid dende o 26 ao 28 de novembro de 2009 e resultou ser o único proxecto de Galicia seleccionado para a comunicación presencial de experiencias, e como tal, constituíu a representación da Xunta de Galicia nas sesións simultáneas de presentacións de experiencias.

Este congreso consolidouse como o acontecemento de maior impacto e participación de cantos se ocupan do uso educativo de Internet, especialmente no entorno iberoamericano. Nesta ocasión, a principal novidade foi que ademais das sesións presenciais, durante os meses previos estivo desenvolvéndose un innovador Congreso virtual no que participaron máis de 10.000 persoas e no que Climántica tivo unha excelente acollida, que resultaría determinante para a selección das súas experiencias web 2.0 para comunicar nesta parte presencial.

Este Congreso conta coa presenza de destacados especialistas en educación e Novas Tecnoloxías, entre os que se encontran o ex Ministro de Educación de Portugal, Roberto Carneiro; a Directora de Programas Educativos da Fundación Telefónica, Marián Juste e o Secretario Xeral da Organización de Estados Iberoamericanos (OEI), Álvaro Marchesi, contando con Brasil como país invitado.

Unha das temáticas máis destacadas no proxecto, foi a expansión das redes sociais interactivas, sobre o que se sustenta a expansión en rede de Climántica. Para debater sobre cómo afectan estas á educación ou qué límites se deben por no seu uso, Bernardo Hernández, Director Mundial de Marketing de Google, debateu sobre este tema con Zaryn Dentzel, creador de Tuenti, que actualmente é a rede social preferida dos xoves, encargándose da moderación da mesma o periodista Manuel Campo Vidal.

Na primeira das dúas comunicacións de Climántica neste congreso, o director do proxecto, Francisco Sóñora Luna, presentou Climántica como un proxecto web 2.0 mediante a comunicación titulada “Innovación 2.0 en la Pedagogía del Cambio Climático con www.climantica.org”. Comezou situando a Climántica como un proxecto global de Educación Ambiental en rede co obxectivo básico de intercambiar ideas e experiencias, xerar produtos didácticos interdisciplinares, enriquecer o currículo de Educación Ambiental e abordar as principais problemáticas ambientais relacionándoas co cambio climático. En canto ao público diana, expuxo que estaba dirixido á cidadanía en xeral e a todos os niveis do sistema educativo con produtos como unidades didácticas, blogs, documentais, novelas, videoxogos, comics, curtos de animación e revistas. Tamén indicou que pon á disposición do cidadán leccións e cursos web de autoaprendizaxe e autoavaliación, ofrecendo contidos en galego, castelán, portugués e inglés.

Destacou ademais que os libros didácticos, (un e dos), que abren cada unha das etapas teñen unha aplicación moi directa nas clases de secundaria e universidade, porque o seu deseño global e interdisciplinar posibilita que a súa aplicación nas diferentes áreas, materias e módulos resulte interesante, sinxela e eficaz, tal e como evidencia o seu uso en clases de Bioloxía, Xeoloxía, Xeografía, Historia, Física, Química, Tecnoloxía e Economía, entre outras. Pero suliñou que o valor máis importante destes libros é a súa capacidade e flexibilidade para orientar ao profesorado na súa adaptación e aplicación para as súas clases.

A continuación situou os seus grandes modelos de aplicación no sistema educativo, destacando para o ensino Secundario o modelo de aplicación en ESO en Proxecto Interdisciplinar, mediante o material didáctico denominado Climaeucambio , por cuxo contido se pode navegar desde o seu apartado de Clima mozo , que permite tamén acceder á aplicación web desenvolta por Meteogalicia de MeteoEscolas que posibilita a representación e comparación dos datos obtidos polos estudantes dende as súas estacións meteorolóxicas. Sinalou ademais a importancia que ten para esta proposta a presenza dun blog temático de Meteoroloxía dinamizado polo técnico de MeteoGalicia Juan Taboada. Outro sistema de Blogs que destacou polo seu éxito académico, foi o que permite o desenvolvemento da nova materia de Ciencias para o Mundo Contemporáneo con edublogues e sobre o que nestes intres se está desenvolvendo a formación da segunda promoción de profesores que o van a aplicar mediante un curso semipresencial que implica 9 sábados presenciais, sendo fundamentais os libros didácticos de cambio climático e de enerxía e cambio climático , curso que tamén se está a desenvolver en Portugal co apoio institucional da Unesco, presentando tamén a importante argumentación que xa se está a desenvolver nos blogs de aula dos 15 centros piloto de Coimbra. Rematou os modelos académicos presentando o modelo de aplicación en Primaria mediante o material didáctico Aprendemos coas Escolas Climánticas en papel e a versión dixital na subweb Primaria.

Por último fixo mención á importancia da web para toda a cidadanía divulgando a actualidade do proxecto en sistema blogue e posibilidade de navegación HTML polo contido das unidades didácticas editadas en papel, que na actualidade son a de cambio climático e a de enerxía. Tamén fixo fincapé nas leccións de autoaprendizaxe sobre cambio climático do apartado de Formación así como a visualización de múltiples vídeos no apartado de Climántica TV e da descarga da primeira novela da colección de Contos Climánticos A Treboada de C do escritor Agustín Agra e tamén dos comics de cambio climático e enerxía. Rematou a súa intervención destacando a importancia do videoxogo web CLMNTK, que é un xogo interactivo de simulación en rede no que os xogadores teñen que xestionar novas poboacións para os habitantes que escapan dunha cidade moi contaminada no ano 2015, conciliando a sostibilidade, o progreso, e a economía, co benestar social da poboación e o respeto ao medio ambiente, tentando que o contorno non se vexa afectado.

A continuación interveu a coordinadora dos blogues de aula, Susana Vázquez, presentando coa súa comunicación a importancia deste recurso na aula en base a exemplificacións da aplicación nun centro do desenvolvemento da nova asignatura común para todos os estudantes de 1º de Bacharelato de España, Ciencias para o Mundo Contemporáneo utilizando estes edublogues no desenvolvemento da totalidade da asignatura.

Coincidindo co Día Mundial do Medio Ambiente, Climántica presenta o programa do II congreso CLMNTK de estudantes e publica “Se queimamos quentamos” en versión navegable html. Esta segunda unidade didáctica aborda a historia das crises enerxéticas e os prezos ambientais das revolucións que nos sacaron delas, para situarnos na actual crise enerxética dos combustibles fósiles e no reto do cambio climático. A unidade finaliza con un resumo de boas prácticas e posibles solucións ambientalmente favorables, aludindo a futuras fontes enerxéticas.

Tamén se publica hoxe o número 2 do cómic de Educación Ambiental “Palmira e Marcial, odisea medioambiental”, que recolle e adapta o contido de “Se queimamos quentamos”. Tanto este número, como os 8 capítulos da segunda unidade, están dispoñibles en formato pdf para a súa descarga desde o apartado ‘Biblioteca’.

Dentro desta segunda etapa de Climántica –e inspirándose no seu contido- tamén se desenvolveu o material didáctico para Primaria “Aprendemos coas Escolas Climánticas”, que a súa vez se apoia nos cómics, na novela e no videoxogo CLMNTK, e cuxas actividades tamén se poden facer de forma interactiva desde o apartado de Primaria desta web.
 
Climántica fixo un esforzo especial na produción didáctica durante este curso 2008-2009 e únese, así, ao chamamento de Educadores pola Sostibilidade da Organización de Estados Iberoamericanos para converter este 5 de xuño nunha xornada de activismo educativo en prol dun Protocolo de Copenhague realmente efectivo. Unha xornada que impregne a actividade escolar e irradie a súa acción a toda a sociedade, tanto ese día como o resto del ano, animando desde a Educación Ambiental aos responsables políticos para que convertan este Protocolo nunha prioridade para nosa supervivencia e a das demais especies. Ademais, quere estender este chamamento á súa rede educativa para que desde os seus blogues se unan a este activismo medioambiental que tan ben están despregando nos seus centros educativos. .

O proxecto Climántica foi un invitado máis no Seminario Europeo sobre o Artigo 6 da Convención marco de Nacións Unidas sobre o Cambio Climático como modelo de boas prácticas a proposta do punto focal de España. Neste seminario, que se celebrou en Estocolmo os días 18, 19 e 20 de maio, abordáronse modelos de boas prácticas europeas en educación, formación e sensibilización do público sobre o cambio climático.

Sitio web oficial: European Regional Workshop on Article 6 of the Convention